كتير بنسمع او بنشوف ناس ممكن تكلم نفسها ، ومش تكلم نفسها وبس دة بتكلم شخص قدامها إحنا مش شايفينه ، لدرجة انه ممكن يشتم بصوت عالي ويبقي عنده انفعالات احنا مش فاهمين ماله ، وممكن كمان نلاقيه دايما بيشتكي ان في أصوات في ودانه مزعجة ومش عارف يتخلص منها ، غير ان ممكن يحصله تصور ان الناس كلها حوليه بتكرهوا و عايزة تموته ?
كل إللى فات ده بيكون غريب عن الأهل ومش بيبقو فاهمين ابنهم او بنتهم مالهم..?
بس تعالى نقرأ البوست ده وانت هتفهم
دة معناه اية؟؟?
الأعراض إللى فوق دي بتحكي عن مريض الفصام
ايه بقى معنى مرض الفصام؟!?
معناه ان الشخص حصل له تغير في كيمياء المخ أدى إلى خلل في افكاره ووظائفه النفسية?
ايون برضو عايزين نفهم اكتر?
هبسطهالك يا سيدي اول حاجة من
أعراض الفصام
-الضالالات/ ودي أفكار بيكون المريض مقتنع بيها ١٠٠%وراسخة في دماغه وهي زي ان حد بيراقبه او يحط له سم في الأكل او عايز يموته ومفيش أي دليل على الكلام ده ومهما حد قاله ان الكلام ده مش حقيقي إللى في دماغه في دماغه ?
بيكون له رد فعل عنيف ممكن يقتل او يأذي إللى حواليه نتيجة انه مصدق أفكاره وبيتفاعل معاها ?
ساعات كتير من الاهل مش فاهمين طبيعة المرض انه نوبات متلاحقة من الغضب وبيفتكروا انه لما بيكون ساكت معناه انه خف لكن الأفكار شغالة في دماغه وبتكون مفاجأة للأهل لما تظهر تاني والعنف يرجع زي الاول ?
العرض التاني..
-الهلاوس/ ودي ممكن تكون سمعية يعنى يسمع أصوات بتكلمه في ودنه تشتمه او تأمره يقتل او يأذي او تعلق على تصرفاته
وممكن تكون علاوي بصرية يشوف أشياء او حاجات غريبة محدش غيره بيشوفها ، وكمان ممكن تكون شمية انه يقول انه شامم ريحة هو بس الي شاممها?
العرض التالت..
-انه يتكلم كلام مش مفهوم يتكلم باللغة غريبة?
-العرض الرابع يعمل سلوكيات غريبة مش مفهومة يعنى انه يرمي الاكل في الزبالة يرمي زيت على الحيطة يحرق ورق يقطع هدومه ويرميها في الشارع يلبس شتوي في عز الصيف والحر او العكس كلها سلوكيات غريبة ومش مفهومة ?
**آخر حاجة هي الأعراض السالبة عشان كلها سلبية يعنى يقعد لوحده مع نفسه منعزل عن الناس مش بيهتم بنظافته يقعد أسابيع مش عايز يستحمه ولايسرح شعره او يغير هدومه طقم واحد لابسه طول الوقت ?
-طيب وايه علاجه ??
*العلاج على مرحلتين
١-المرحلة الأولى/ تقييم خطورة الأعراض على المريض وعلى أهله وبناءا عليها نشوف هل تحتاج دخول المستشفى لمدة ٤ _٦ أسابيع لحين استقرار الحالة ?
٢-المرحلة التانية/ بتكون علاج دوائي يساعد المريض أن أفكاره تهدى ويكون قادر على التعامل مع إللى حواليه ?
وبعد كده بيدخل في جلسات علاج معرفي سلوكي الهدف منها تاهيله عشان يعرف يتعامل مع المجتمع والناس إللى حواليه?♥️